Fe hyfforddodd Geraint yn ysbyty’r Royal National Throat Nose and Ear yn Gray’s Inn Road, Llundain, ac yno y cyfarfu â’i ddarpar wraig Jayne. Cymhwysodd y ddau ohonynt fel awdiolegwyr ym 1976 ac fe briododd y ddau'r flwyddyn ganlynol. 

Parhaodd Jayne i weithio i’r GIG, ond gadawodd Geraint i ymuno a’r band gwerin Ar Log fel canwr a gitarydd. Wedi teithio’r byd gyda’r grŵp, penderfynodd ddychwelyd at ei broffesiwn gwreiddiol ac ymuno a chwmni cymorth clyw preifat gan ddechrau gweithio gyda chanolfan glyw David Rees yn Cheltenham. 

​

Ar ôl i’r cwmni ddod yn rhan o Siemens Hearing ym 1983, symudodd Geraint a Jayne yn ôl i Gymru gyda’u teulu ifanc, Ffion ac Osian.

Sefydlodd Geraint ei fusnes ei hun, Glynne Davies Hearing/Cymorth I’r Clyw ym 1990 a gweithiodd o amrywiol glinigau cyn agor ei Ganolfan Cymorth i’r Clyw yn Llanrwst, sef tref farchnad ei dad - yr awdur, bardd a'r darlledwr T Glynne Davies a enillodd y Goron yn Eisteddfod Genedlaethol 1951.

Cymhwysodd ei ferch Ffion fel Awdiolegydd Cymorth i’r Clyw yn 2005 ac ymunodd â’i thad yn y busnes, ac yna yn 2015, ymunodd ei brawd Osian â’r cwmni.

​

Rydym yn gweithio’n agos gyda’r ymgynghorydd amlwg ym maes Clustiau Trwyn a Gwddw, sef Mr Zak Hammad FRCS.

Busnes teuluol annibynnol sydd gennym ac rydym yn falch o allu darparu gofal iechyd y clyw gorau posibl.